दापोली (वार्ताहर): दापोली–हर्णे मार्गावर काही दिवसांपूर्वी झालेल्या भीषण अपघातात महाळुंगे येथील तरुण सुशांत दशरथ झिमन (वय अंदाजे २५) हा गंभीर जखमी झाला असून सध्या त्याच्यावर मुंबई येथील रुग्णालयात उपचार सुरू आहेत.
मिळालेल्या माहितीनुसार, दापोलीकडून हर्णेकडे जाणारा डंपर आणि हर्णे रोडकडून दापोलीकडे येणारी दुचाकी यांच्यात गिम्हवणे परिसरात पटवर्धन हॉस्पिटल व पंजाब नॅशनल बँकजवळ समोरासमोर जोरदार धडक झाली. धडकेचा जोर इतका तीव्र होता की दुचाकीस्वार सुशांत झिमन रस्त्यावर फेकला गेला व गंभीर जखमी झाला.
अपघातानंतर स्थानिक नागरिकांनी तत्काळ मदतीस धाव घेत जखमी सुशांत यांना दापोली उपजिल्हा रुग्णालयात दाखल केले. मात्र त्यांची प्रकृती गंभीर असल्याने पुढील उपचारासाठी त्यांना मुंबई येथील जसलोक रुग्णालयात हलविण्यात आले असून तेथे त्यांच्यावर अतिदक्षता विभागात उपचार सुरू आहेत.
उपचारासाठी आर्थिक मदतीचे आवाहन
सुशांत झिमन यांच्या उपचारासाठी सुमारे ₹१०.५ लाख खर्च अपेक्षित असल्याचे कुटुंबीयांनी सांगितले आहे. त्यांच्या कुटुंबाची आर्थिक परिस्थिती मर्यादित असल्यामुळे नातेवाईक व मित्रपरिवाराने समाजातील दानशूर नागरिकांना आर्थिक मदतीचे आवाहन केले आहे.
मदत करू इच्छिणाऱ्या नागरिकांनी उपलब्ध QR कोडद्वारे किंवा संबंधित कुटुंबीयांशी संपर्क साधून शक्य ती आर्थिक मदत करावी, असे आवाहन करण्यात आले आहे.
“आपली छोटीशी मदतही एका तरुणाचे प्राण वाचवू शकते,” अशी भावनिक विनंती कुटुंबीयांकडून करण्यात आली आहे.