दापोली (वार्ताहर): दापोली तालुक्यातील आरोग्य विभागातील एका कर्मचाऱ्यावर हल्ला झाल्याच्या घटनेची चर्चा मागील दोन दिवसांपासून सोशल मीडियावर होत आहे. मात्र या प्रकरणाबाबत आपली बाजू मांडताना सामाजिक कार्यकर्ते संख्या कोळेकर यांनी आरोप करणे सोपे असले तरी संपूर्ण वस्तुस्थिती जनतेसमोर येणे गरजेचे असल्याचे सांगितले आहे.

कोळेकर यांनी दिलेल्या माहितीनुसार, संबंधित आरोग्य कर्मचारी यांची ड्युटी पिसई येथे सायंकाळी ६ वाजेपर्यंत असताना त्यांनी सुमारे ५.३० वाजताच ड्युटी सोडून सुमारे दहा किलोमीटर अंतरावरील त्यांच्या व्यवसायाच्या ठिकाणी येऊन वैयक्तिक वाद घालण्यास सुरुवात केली. त्या वेळी शिवीगाळ व वाद सुरू झाला. या प्रकरणात पोलीस ठाण्यात जाऊन तक्रार नोंदविण्यासाठी आम्ही निघालो असता संबंधित कर्मचाऱ्यांनी वेगाने गाडी चालवत आमच्या वाहनाला धडक दिल्याचा आरोप कोळेकर यांनी केला आहे.

या घटनेदरम्यान मारहाण झाली असून कपडे फाटले असल्याचेही त्यांनी सांगितले. ड्युटीवर असताना शासकीय गणवेशाचा धाक दाखवून खाजगी व्यवसायाच्या ठिकाणी येऊन दादागिरी करणे कितपत योग्य आहे, असा सवालही त्यांनी उपस्थित केला.

मुळात हा वाद एका अपघाताच्या घटनेतून निर्माण झाला होता. फोनवर सामंजस्याने तो सोडवण्याचा प्रयत्न करत असताना पोलीस ठाण्यात जाऊन कायदेशीर मार्गाने तो सोडवू, अशी आमची भूमिका होती. मात्र तरीही संबंधित कर्मचाऱ्यांनी अर्वाच्च भाषेत शिवीगाळ व धमक्या दिल्याचा आरोप कोळेकर यांनी केला आहे.

शासकीय कर्मचारी कार्यक्षेत्र सोडून खाजगी वादासाठी गणवेशाचा गैरवापर करीत असल्यास त्याचा आरोग्य विभागाच्या प्रतिमेवर परिणाम होतो. अशा काही कर्मचाऱ्यांच्या हलगर्जीपणामुळे रुग्णांना वेळेत उपचार मिळत नाहीत, असेही कोळेकर यांनी म्हटले आहे.

या घटनेप्रकरणी भारतीय न्याय संहिता २०२३ अंतर्गत कलम ७४, ११५(२), ३५१(२), ३५२ आणि ३/५ अन्वये गुन्हा दाखल करण्यात आला असल्याचे कोळेकर यांनी सांगितले. संबंधित आरोपींना तातडीने अटक करून त्यांच्यावर निलंबनाची कारवाई करावी, अशी मागणी त्यांनी जिल्हाधिकाऱ्यांकडे केली आहे.