Shri Manaidevi Temple Talsure येथे ग्रामदेवता श्री मानाईदेवी मंदिराचा जिर्णोद्धार व मूर्ती प्रतिष्ठापना सोहळा तीन दिवस धार्मिक विधींसह मोठ्या उत्साहात पार पडत आहे.

दापोली (वार्ताहर): दापोली तालुक्यातील टाळसुरे गावची ग्रामदेवता श्री मानाईदेवी मंदिराचा जिर्णोद्धार व नवीन मूर्ती प्रतिष्ठापना सोहळा शनिवार दि. १४ मार्च २०२६ ते सोमवार दि. १६ मार्च २०२६ या कालावधीत विविध धार्मिक कार्यक्रमांनी साजरा होत आहे. श्री मानाईदेवी मंदिर विश्वस्त संस्था टाळसुरे यांच्या वतीने हा सोहळा आयोजित करण्यात आला आहे.

कार्यक्रमाची सुरुवात शनिवार दि. १४ मार्च रोजी दुपारी २ वाजता अघोरहोम विधीने करण्यात आली. या विधीमध्ये जुन्या देवतांचे पाणी उतरविण्याचा धार्मिक कार्यक्रम संपन्न झाला.

रविवार दि. १५ मार्च रोजी सकाळी ८.३० वाजता देव प्रतिष्ठा कार्यक्रम पार पडला. यामध्ये गणपती पूजन, पुण्याह वाचन, नवीन देवतांना स्नान, नवग्रह होम व वास्तुशांत होम यांसारखे वेदशास्त्रानुसार विधी करण्यात आले.

सोमवार दि. १६ मार्च रोजी सकाळी ८.३० वाजता देवता स्थापना प्रतिष्ठा व कलशारोहण सोहळा आयोजित करण्यात आला आहे. दुपारी १२.३० ते २ या वेळेत नवीन देवतांना हवन करून देवस्थापना व मंदिरावर कलशारोहण करण्यात येणार आहे. यानंतर उपस्थितांसाठी स्नेहभोजन तसेच महिलांसाठी हळदीकुंकू कार्यक्रम आयोजित करण्यात आला आहे. या कार्यक्रमाच्या अध्यक्षस्थानी टाळसुरेच्या सरपंच सौ. पूर्वा सकपाळ असणार आहेत.

दुपारी ३ वाजल्यापासून सर्व देणगीदारांचा सत्कार करण्यात येणार असून उपस्थित मान्यवरांचे मनोगत होणार आहे. रात्रौ ९.३० वाजता अध्यक्षीय मनोगत व आभार प्रदर्शनानंतर “बहुरंगी नमन” या सांस्कृतिक कार्यक्रमाचे सादरीकरण मौजे माभळे, ता. संगमेश्वर येथील कलाकारांकडून होणार आहे.

या सोहळ्यात श्री देव मानाई, कालेश्री, भैरी व जोगेश्री या देवतांची प्रतिष्ठापना वेदशास्त्र संपन्न गुरुजींच्या उपस्थितीत श्री. थोरे, श्री. चोगले, श्री. सणस, श्री. गौरत व श्री. खोत यांच्या हस्ते करण्यात येत आहे.

मंदिराच्या कलशारोहणाचा विधी अविनाश गणेश थोरे (गाव पाटील व उपाध्यक्ष, श्री मानाईदेवी मंदिर विश्वस्त संस्था) यांच्या शुभहस्ते तर जयवंत शंकर जालगावकर (अध्यक्ष, श्री मानाईदेवी मंदिर विश्वस्त संस्था टाळसुरे) यांच्या अध्यक्षतेखाली पार पडणार आहे.

या धार्मिक सोहळ्याचे आयोजन श्री मानाईदेवी मंदिर विश्वस्त संस्था टाळसुरे तसेच ग्रामस्थ व महिला मंडळ टाळसुरे यांच्या सहकार्याने करण्यात आले आहे. या कार्यक्रमास ग्रामस्थ, देणगीदार व भाविकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन विश्वस्त संस्थेच्या वतीने करण्यात आले आहे.