दापोली, ता. १२ (वार्ताहर) : दापोली येथील डॉ. बाळासाहेब सावंत कोकण कृषी विद्यापीठाच्या कृषी महाविद्यालयात कार्यरत असलेल्या एका सहयोगी प्राध्यापकाविरुद्ध विद्यार्थिनीच्या लैंगिक छळप्रकरणी गंभीर कारवाई करण्यात आली आहे. संबंधित प्राध्यापकाची सहयोगी प्राध्यापक पदावरून सहाय्यक प्राध्यापक पदावर पदानवती करण्यात आली असून त्यांची प्रादेशिक फळ संशोधन केंद्र, वेंगुर्ला येथे बदली करण्यात आली आहे.

मिळालेल्या माहितीनुसार, कृषी महाविद्यालय दापोली येथे शिक्षण घेणाऱ्या एका विद्यार्थिनीने १८ जुलै २०२५ रोजी विद्यापीठाच्या कुलगुरूंना लेखी तक्रार देत संबंधित सहयोगी प्राध्यापकाने आपला लैंगिक छळ केल्याचा आरोप केला होता. या तक्रारीची गांभीर्याने दखल घेत विद्यापीठ प्रशासनाने संबंधित प्राध्यापकाला सेवेतून निलंबित केले.

त्यानंतर या प्रकरणाची सखोल चौकशी करण्यासाठी ६ ऑगस्ट २०२५ रोजी त्रिस्तरीय चौकशी समिती स्थापन करण्यात आली होती. समितीने केलेल्या चौकशीअंती नुकताच आपला अहवाल विद्यापीठ प्रशासनाकडे सादर केला आहे.

चौकशी अहवालात संबंधित प्राध्यापकाने आपल्या पदाचा व अधिकाराचा गैरवापर केला असून शिक्षक-विद्यार्थी या पवित्र नात्याला तडा देणारे कृत्य केल्याचे नमूद करण्यात आले आहे. तसेच हे कृत्य नैतिक अध:पतन दर्शविणारे, कायदा व सेवा नियमांचे उल्लंघन करणारे आणि शासकीय सेवेस अशोभनीय असल्याचे समितीने स्पष्ट केले आहे.

या अहवालाच्या आधारे विद्यापीठ प्रशासनाने कठोर कारवाई करत संबंधित प्राध्यापकाची पदानवती करून त्यांची प्रादेशिक फळ संशोधन केंद्र, वेंगुर्ला येथे बदली केली आहे.

दरम्यान, संबंधित प्राध्यापकांची सेवा आणखी दोन वर्षे शिल्लक असून या शिक्षेमुळे त्यांना मोठा आर्थिक फटका बसणार असल्याची माहिती समोर आली आहे.