संगलट (खेड) : इक्बाल जमादार

गाव विकास समिती संघटनेच्या कोअर कमिटीने शिफारस केलेल्या नावांवर शिक्कामोर्तब करत देवरुख येथे झालेल्या महत्त्वपूर्ण बैठकीत संघटनेची नवी कार्यकारिणी जाहीर करण्यात आली. अध्यक्ष उदय गोताड आणि संघटन प्रमुख सुहास खंडागळे यांच्यात झालेल्या सविस्तर चर्चेनंतर ही कार्यकारिणी अंतिम करण्यात आली असून, अनुभवी तसेच नव्या चेहऱ्यांना या कार्यकारिणीत संधी देण्यात आली आहे.

नव्या कार्यकारिणीनुसार उदय गोताड हे अध्यक्षपदी तर सुहास खंडागळे हे संघटन प्रमुख म्हणून काम पाहणार आहेत. उपाध्यक्षपदी सुरेंद्र काबदुले, मंगेश धावडे आणि राहुल यादव यांची नियुक्ती करण्यात आली आहे. संघटनेच्या महत्त्वाच्या सरचिटणीस पदावर मंगेश कांगणे आणि मुझम्मील काझी यांची निवड झाली असून, मुझम्मील काझी यांच्याकडे मुख्य प्रवक्त्याची अतिरिक्त जबाबदारीही सोपवण्यात आली आहे.

संघटनेच्या जिल्हा पातळीवरील बांधणीसाठी श्यामकर्ण भोपळकर यांना रत्नागिरी जिल्हाध्यक्ष पदी कायम ठेवण्यात आले आहे. तसेच सुकांत पाडळकर यांची जिल्हा उपाध्यक्ष पदी नियुक्ती करण्यात आली आहे. सतेश जाधव यांच्याकडे जिल्हा सरचिटणीस व मुख्य प्रचारक पदाची जबाबदारी देण्यात आली असून विशाल धुमक यांची जिल्हा संघटक पदी निवड करण्यात आली आहे.

तालुका पातळीवर अमित गमरे यांना संगमेश्वर तालुका अध्यक्ष म्हणून कायम ठेवण्यात आले आहे. त्यांच्या सोबत वैभव जुवळे (कार्याध्यक्ष), नितीन गोताड (उपाध्यक्ष), दैवत पवार (सरचिटणीस), महेंद्र घुग (संघटक) आणि प्रकाश खंडागळे (सचिव) अशी टीम नियुक्त करण्यात आली आहे. विशेष म्हणजे सुकांत पाडळकर यांच्याकडे रत्नागिरी तालुका अध्यक्ष पदाची धुरा सोपवण्यात आली आहे.

महिला आघाडीच्या सक्षमीकरणासाठी सौ. दीक्षा खंडागळे यांची अध्यक्षा, सौ. ईश्वरी यादव यांची उपाध्यक्षा आणि सौ. उजमा मापारी-खान यांची सरचिटणीस पदी निवड करण्यात आली आहे. तसेच सौ. अनवी घुग आणि सौ. नियती गोताड यांचा सदस्य म्हणून समावेश करण्यात आला आहे.

नव्या दमाच्या या कार्यकारिणीमुळे गाव विकास समिती संघटनेच्या कामाला अधिक गती मिळेल आणि ग्रामीण भागातील विकासाच्या प्रश्नांवर प्रभावीपणे काम करता येईल, असा विश्वास यावेळी व्यक्त करण्यात आला.