प्रतिनिधी

सध्या सुरू असलेल्या गॅस टंचाईच्या पार्श्वभूमीवर ग्राहकांनी आपल्या अधिकारांची माहिती ठेवणे अत्यंत गरजेचे झाले आहे. केंद्र सरकार आणि तेल कंपन्यांनी गॅस सिलेंडर डिलिव्हरीसाठी ठराविक वेळमर्यादा निश्चित केली असून त्यानुसार सेवा देणे बंधनकारक आहे.

डिलिव्हरीबाबतचे नियम काय?

शहरी भागामध्ये गॅस सिलेंडर बुक केल्यानंतर तो ४८ तासांच्या (२ दिवस) आत ग्राहकाच्या घरी पोहोचणे आवश्यक आहे. तर ग्रामीण व दुर्गम भागात हा कालावधी ४८ ते ७२ तास (२ ते ३ दिवस) इतका ठेवण्यात आला आहे.

पॅनिक बुकिंग टाळण्याचे आवाहन

सरकारने ग्राहकांना अनावश्यक घाईघाईने बुकिंग न करण्याचे आवाहन केले आहे. एका सिलेंडरच्या डिलिव्हरीनंतर पुढील बुकिंगसाठी साधारणपणे २५ ते ४५ दिवसांचे अंतर ठेवणे अपेक्षित आहे.

डिलिव्हरी उशिरा झाल्यास काय करावे?

जर ठरलेल्या वेळेत सिलेंडर मिळाला नाही, तर ग्राहक संबंधित तेल कंपनीच्या अधिकृत टोल-फ्री क्रमांकावर तक्रार करू शकतात. तसेच, ग्राहकाने स्वतः एजन्सीवर जाऊन सिलेंडर आणल्यास, डिलिव्हरी चार्ज परत मागण्याचा अधिकार ग्राहकाला आहे, कारण हा खर्च सिलेंडरच्या किमतीत समाविष्ट असतो.

दरम्यान, होर्मुझची सामुद्रधुनी परिसरातील तणावामुळे पुरवठा साखळीवर काहीसा परिणाम झाल्याचे समोर येत आहे. तरीही पेट्रोलियम मंत्रालयाने घरगुती वापरासाठी पुरेसा गॅस साठा उपलब्ध करून देण्यासाठी प्रयत्न सुरू असल्याचे आश्वासन दिले आहे.

ग्राहकांनी आपल्या हक्कांबाबत जागरूक राहून गरज असल्यास तक्रार नोंदवावी, असे आवाहन करण्यात येत आहे.