मुंबई (वार्ताहर) : राज्यात अवकाळी पावसाचे संकट कायम असून १८ मार्च रोजी महाराष्ट्र मधील तब्बल २४ जिल्ह्यांना यलो अलर्ट जारी करण्यात आला आहे. विशेषतः रायगड आणि रत्नागिरी जिल्ह्यांना विजांच्या कडकडाटासह पावसाचा इशारा देण्यात आला आहे.

कोकण विभागातील मुंबई, ठाणे, सिंधुदुर्ग आणि पालघर येथे उष्ण व दमट हवामान राहणार असून, रायगड व रत्नागिरीत मेघगर्जनेसह पावसाची शक्यता आहे. मुंबईत कमाल तापमान ३२ ते ३६ अंश सेल्सियस तर किमान २४ ते २७ अंश राहण्याचा अंदाज आहे.

पश्चिम महाराष्ट्रातील पुणे, सातारा, सांगली, कोल्हापूर आणि सोलापूर जिल्ह्यांनाही यलो अलर्ट देण्यात आला असून, या भागात ताशी ३० ते ४० किमी वेगाने वारे वाहण्याची शक्यता आहे.

उत्तर महाराष्ट्रात नाशिक, धुळे, जळगाव आणि नंदुरबार येथे हलक्या पावसाचा अंदाज आहे, तर अहिल्यानगरला यलो अलर्ट देण्यात आला आहे.

मराठवाड्यातील नांदेड, परभणी, धाराशिव, हिंगोली, बीड आणि लातूर जिल्ह्यांमध्ये हलका ते मध्यम स्वरूपाचा पाऊस पडण्याची शक्यता वर्तवण्यात आली आहे.

विदर्भातील नागपूर, वाशिम, यवतमाळ, चंद्रपूर, गडचिरोली, बुलढाणा आणि वर्धा येथे वादळी वाऱ्यासह पावसाचा इशारा देण्यात आला आहे.

एकंदरीत, राज्यात विजांच्या कडकडाटासह अवकाळी पावसाची शक्यता असून, शेतकऱ्यांनी पिकांची योग्य काळजी घेण्याचे आवाहन हवामान विभागाने केले आहे.