नागपूर : अखिल भारतीय काँग्रेस कडून देशभरात सुरू असलेल्या संघटन सृजन अभियानाचा पुढचा टप्पा आता महाराष्ट्रात राबविण्यात येणार आहे. या अंतर्गत राज्यातील सर्व शहर आणि जिल्हा काँग्रेस अध्यक्षांची नव्याने नियुक्ती केली जाणार असून, इच्छुकांना अर्ज करणे बंधनकारक करण्यात आले आहे.

या प्रक्रियेसाठी काँग्रेसकडून राज्यात तब्बल ३७ निरीक्षकांची नियुक्ती करण्यात आली आहे. हे निरीक्षक संबंधित जिल्ह्यांमध्ये जाऊन स्थानिक लोकप्रतिनिधी, पदाधिकारी, तसेच काँग्रेस विचारांच्या कार्यकर्त्यांशी चर्चा करून अध्यक्षपदासाठी पॅनल तयार करणार आहेत.

निरीक्षकांची भूमिका महत्त्वाची

निरीक्षक जिल्ह्यात किमान सात दिवस मुक्काम करत विविध स्तरांवरील पदाधिकारी, सामाजिक कार्यकर्ते, एनजीओ, सिव्हिल सोसायटी आणि व्यावसायिक संघटनांशी संवाद साधतील. दररोजचा अहवाल त्यांना केंद्रीय नेतृत्वाकडे सादर करावा लागणार आहे.

या चर्चेतून मिळालेल्या माहितीच्या आधारे जास्तीत जास्त सहा नावांचे पॅनल तयार करून ते अखिल भारतीय काँग्रेस कडे पाठवले जाईल. यामध्ये लिंग, जातीय समतोल, विभागीय प्रतिनिधित्व आणि स्थानिक नेत्यांचा कल यांचा विचार करून प्राधान्यक्रम निश्चित केला जाईल.

अर्ज प्रक्रिया अनिवार्य

शहर व जिल्हाध्यक्षपदासाठी इच्छुक असलेल्या कार्यकर्त्यांना संबंधित निरीक्षकांकडे अर्ज सादर करावा लागणार आहे. विशेष म्हणजे, एखाद्या व्यक्तीने अर्ज केला नसला तरी स्थानिक पातळीवर त्याला मोठा पाठिंबा असल्यास त्याचे नावही पॅनलमध्ये समाविष्ट केले जाऊ शकते.

निरीक्षकांवरही ‘वॉच’

निरीक्षकांवर स्थानिक राजकीय प्रभाव पडू नये यासाठी दिल्लीहून विशेष ‘वॉच’ ठेवण्यात येणार आहे. यासाठी गुप्त निरीक्षक नेमले जाणार असून, त्यांच्या अहवालाची पडताळणी मूळ निरीक्षकांच्या अहवालाशी केली जाणार आहे.

देशातील छत्तीसगड, मध्य प्रदेश, गुजरात, राजस्थानसह अनेक राज्यांत या अभियानाअंतर्गत मोठे बदल करण्यात आले असून, काही ठिकाणी पारंपरिक नेत्यांऐवजी कार्यकर्त्यांना संधी देण्यात आली आहे. त्यामुळे महाराष्ट्रातील ही फेररचना देखील महत्त्वाची ठरणार असल्याचे राजकीय वर्तुळात बोलले जात आहे.