सिंधुदुर्ग जिल्ह्यातील मालवण तालुक्यात एक अजब आणि आश्चर्यकारक घटना घडली असून आकाशातून सुमारे पाच किलो वजनाचा बर्फाचा मोठा तुकडा घरावर कोसळल्याने ग्रामस्थांमध्ये खळबळ उडाली आहे.

मिळालेल्या माहितीनुसार, देवली (ता. मालवण) येथील खालची परबवाडी परिसरात शुक्रवारी दुपारी सुमारे दीड वाजण्याच्या सुमारास ही घटना घडली. अर्चना देऊलकर या आपल्या घरात स्वयंपाक करत असताना अचानक मोठा आवाज झाला.

आवाजाचा स्रोत शोधण्यासाठी बाहेर पडल्यावर छतावरील कौले व लाकडी भाग तुटलेले दिसले. तपास केला असता सुमारे पाच किलो वजनाचा बर्फाचा गोळा थेट स्वयंपाकघरात पडल्याचे आढळले. सुदैवाने या घटनेत कोणतीही जीवितहानी झाली नाही.

विशेष म्हणजे घटना घडली त्या वेळी आकाश पूर्णपणे निरभ्र होते. भर उन्हाळ्यात अचानक बर्फाचा तुकडा कोसळल्याने ग्रामस्थ आश्चर्यचकित झाले असून परिसरात विविध चर्चांना उधाण आले आहे.

तज्ञांच्या मते, अशा प्रकारच्या घटना कधीकधी विमानातून गळणाऱ्या बर्फामुळे (ब्ल्यू आईस) घडू शकतात. मात्र या घटनेबाबत अधिकृत माहिती अद्याप उपलब्ध नसून तपासाची गरज व्यक्त केली जात आहे.