खेड (प्रतिनिधी):

मुंबई-गोवा महामार्गावर भरणे येथील जगबुडी नदीच्या पुलावर रविवारी सकाळी साडेसातच्या सुमारास भीषण अपघात घडला. भरधाव वेगातील मालवाहू कंटेनरने दुभाजक तोडत दोन पुलांमधील जागेत अडकून पडल्याने काही काळ परिसरात भीतीचे वातावरण निर्माण झाले.

मिळालेल्या माहितीनुसार, संबंधित कंटेनर गोव्याहून मुंबईकडे जात होता. मात्र, वाहनाचा वेग जास्त असल्याने चालकाचे वाहनावरील नियंत्रण सुटले आणि कंटेनरने दुभाजक तोडून दोन पुलांच्या मधोमध अडकून पडला. अपघातात कंटेनरचा अर्धा भाग सुमारे १०० फूट खोल नदीकडे झुकला होता, त्यामुळे तो नदीत कोसळण्याची शक्यता निर्माण झाली होती.

घटनेची माहिती मिळताच पोलिस व बचाव पथक तात्काळ घटनास्थळी दाखल झाले. मोठ्या प्रयत्नांनंतर दोन क्रेनच्या सहाय्याने कंटेनर सुरक्षितरीत्या बाहेर काढण्यात आला. या अपघातात चालकाला किरकोळ दुखापत झाली असून त्याच्यावर उपचार सुरू आहेत.

दरम्यान, अपघातामुळे मुंबई-गोवा महामार्गावरील एक मार्गिका सुमारे दीड तास बंद ठेवावी लागली. परिणामी, या मार्गावर मोठ्या प्रमाणात वाहतूक कोंडी निर्माण झाली होती.

विशेष म्हणजे, गेल्या आठवड्यातच याच जगबुडी पुलावर दुसरा मोठा अपघात घडला असून वारंवार होणाऱ्या अपघातांमुळे पुलाच्या सुरक्षेवर प्रश्नचिन्ह निर्माण झाले आहे. स्थानिक नागरिकांकडून प्रशासनाने तातडीने उपाययोजना कराव्यात, अशी मागणी होत आहे.