संगमेश्वर (प्रतिनिधी) :

लोकप्रिय रिअॅलिटी शो Bigg Boss Marathi मधील आपल्या दमदार खेळामुळे प्रेक्षकांची मनं जिंकणारी विजेती Tanvi Kolte आज शुक्रवार, दिनांक २४ एप्रिल रोजी आपल्या साखरपा मायभूमीत आगमन करत आहे. तिच्या या यशाचा जल्लोष साजरा करण्यासाठी साखरपा परिसरात सायंकाळी ५ वाजता भव्य स्वागत रॅलीचे आयोजन करण्यात आले आहे.

ही रॅली रत्नागिरी-नागपूर महामार्गावरून सुरू होणार असून, साखरप्याच्या मुख्य बाजारपेठेतून मार्गक्रमण करत शहरभर फेरी मारणार आहे. रॅलीदरम्यान ढोल-ताशांच्या गजरात आणि फटाक्यांच्या आतषबाजीत तन्वीचे जल्लोषात स्वागत करण्यात येणार आहे.

रॅलीची सांगता नानासाहेब शेट्ये सभागृह येथे होणार असून, त्यानंतर विशेष सत्कार समारंभाचे आयोजन करण्यात आले आहे. या कार्यक्रमात तन्वी कोलते आपल्या बिग बॉस प्रवासातील अनुभव, संघर्ष आणि यशाबाबत मनोगत व्यक्त करणार आहे. तसेच ती आपल्या कुटुंबीय, गावकरी आणि चाहत्यांशी थेट संवाद साधणार आहे.

या सोहळ्यासाठी मोठ्या प्रमाणात गर्दी होण्याची शक्यता लक्षात घेता स्थानिक प्रशासनाने सुरक्षा व्यवस्था कडक केली आहे. रॅली मार्गावर पोलिसांचा मोठा बंदोबस्त तैनात करण्यात येणार असून, वाहतुकीची कोंडी टाळण्यासाठी वाहतूक विभागानेही योग्य ती उपाययोजना केली आहे.

👉 साखरप्यात आज सायंकाळी उत्साहाचे आणि अभिमानाचे वातावरण पाहायला मिळणार असून, तन्वीच्या स्वागतासाठी नागरिकांमध्ये मोठी उत्सुकता आहे.