लांजा (प्रतिनिधी) :

हवामान खात्याचा अंदाज खरा ठरवत गुरुवारी दुपारनंतर लांजा तालुक्याच्या पूर्व भागात वादळी वाऱ्यासह पावसाने जोरदार हजेरी लावली. वेरळ, खेरवसे, वेरवली आदी गावांमध्ये विजांच्या कडकडाटासह गारांचा पाऊसही पडला, तर लांजा शहर परिसरात केवळ तुरळक सरींची नोंद झाली.

गेल्या काही दिवसांपासून वाढलेल्या उष्णतेमुळे नागरिक हैराण झाले होते. अशातच पावसामुळे काही प्रमाणात दिलासा मिळाला असला, तरी वादळी वाऱ्यामुळे आणि गारपिटीमुळे काही ठिकाणी नुकसान होण्याची भीती व्यक्त केली जात आहे.

तालुक्याच्या पूर्व भागातील अनेक गावांमध्ये वाऱ्याचा वेग वाढल्याने झाडांची हालचाल, विजांचा कडकडाट आणि गारांचा वर्षाव असे वातावरण पाहायला मिळाले. मात्र लांजा शहरात पावसाचा प्रभाव कमी प्रमाणात दिसून आला.

दरम्यान, या अवकाळी पावसामुळे आंबा बागायतदारांमध्ये चिंतेचे वातावरण निर्माण झाले आहे. हंगामाच्या तोंडावर पडलेल्या गारपिटीमुळे आंबा पिकाला फटका बसण्याची शक्यता व्यक्त केली जात आहे.