लांजा (प्रतिनिधी) :

घरमालकाची परवानगी न घेता घराच्या छप्पराची दुरुस्ती करताना कौले, लाकडी रिपा आणि वासे काढून सुमारे ४ लाख रुपयांचे नुकसान केल्याप्रकरणी लांजा पोलिसांनी एका व्यक्तीविरोधात गुन्हा दाखल केला आहे.

पोलिसांनी दिलेल्या माहितीनुसार, ही घटना १५ ते २१ एप्रिल दरम्यान लांजा तालुक्यातील कुरंग मधली वाडी येथे घडली. याप्रकरणी श्रीपाद महादेव कदम (वय ५२, सध्या रा. मीरा भाईंदर, जि. ठाणे) यांनी Lanja Police Station येथे तक्रार नोंदवली आहे.

तक्रारीनुसार, कुरंग मधलीवाडी येथे सामूहिक मालकीचे घर असून त्याचे छप्पर एकच आहे. या घराच्या दुरुस्तीचे काम बाळकृष्ण रमेश पांचाळ (रा. ता. राजापूर) यांनी घेतले होते. मात्र, श्रीपाद कदम यांनी त्यांच्या भागातील छप्पर दुरुस्ती न करण्यास सांगूनही संबंधिताने त्यांच्या घरावरील कौले, वासे व लाकडी रिपा काढून टाकल्या.

तसेच घरात प्रवेश करून आतील साहित्याचीही नासधूस केल्याचा आरोप तक्रारीत करण्यात आला आहे. या प्रकारात एकूण सुमारे ४ लाख रुपयांचे नुकसान झाल्याचे नमूद करण्यात आले आहे.

या तक्रारीच्या आधारे पोलिसांनी बाळकृष्ण पांचाळ याच्याविरुद्ध Bharatiya Nyaya Sanhita 2023 अंतर्गत कलम ३२९ (४) व ३२४ (५) नुसार गुन्हा दाखल केला आहे.

या प्रकरणाचा पुढील तपास पोलीस निरीक्षक निळकंठ बगळे यांच्या मार्गदर्शनाखाली पोलीस हेडकॉन्स्टेबल दिनेश आखाडे करीत आहेत.