खून प्रकरणातील तीनही आरोपींना अटक

खेड :- तालुक्यातील मेटे मोहल्ला येथील शफी अब्दुल्ला वरवटकर (वय ५५) यांच्या खूनप्रकरणी पोलिसांना अनेक दिवस गुंगारा देणाऱ्या तीन आरोपींना अखेर पोलिसांनी अटक केली आहे. कादिर शमशुद्दीन घारे, गणी इस्माईल बोट आणि अशरफ महामूद बोट (तिघेही रा. मेटे-मोहल्ला, ता. खेड) अशी अटक करण्यात आलेल्या आरोपींची नावे आहेत.

ही कारवाई गुरुवारी, २३ एप्रिल रोजी सायंकाळी ७:३० वाजण्याच्या सुमारास खेड एसटी बसस्थानक परिसरात करण्यात आली. तब्बल १७ दिवस पोलिसांना चकवा देत हे तिघेही पसार होते.

प्राप्त माहितीनुसार, शफी वरवटकर यांची बायपास शस्त्रक्रिया झाली होती. ही माहिती असूनही ६ एप्रिल रोजी सायंकाळी कादिर घारे, गणी बोट आणि अशरफ बोट यांनी शफी वरवटकर यांना बेदम मारहाण केली. या मारहाणीत शफी वरवटकर यांचा मृत्यू झाला असल्याचे तक्रारीत नमूद करण्यात आले आहे.

या प्रकरणी शेख अली हसन वरवटकर यांनी पोलिस ठाण्यात तक्रार दिल्यानंतर तिघांवर खुनाचा गुन्हा दाखल करण्यात आला होता. तेव्हापासून आरोपी फरार होते.

पोलिस निरीक्षक विवेक अहिरे यांच्या मार्गदर्शनाखाली विविध पथके त्यांचा शोध घेत होती. अखेर आरोपी खेड परिसरात येणार असल्याची गोपनीय माहिती पोलिसांना मिळाली. त्यानंतर सापळा रचून पोलिसांनी तिन्ही फरार आरोपींना अटक केली.

पुढील तपास पोलिसांकडून सुरू आहे.