दापोली (प्रतिनिधी) – गोवंश संवर्धन, संरक्षण आणि त्यासंदर्भातील प्रभावी कायद्यांच्या अंमलबजावणीसाठी ‘गो सम्मान आव्हान अभियान’ दापोलीच्या वतीने सोमवार, दि. २७ एप्रिल २०२६ रोजी मा. तहसीलदार मॅडम यांना सविस्तर निवेदन सादर करण्यात आले. या अभियानाला स्थानिक नागरिक, सामाजिक कार्यकर्ते व गोप्रेमी यांचा उत्स्फूर्त प्रतिसाद मिळाल्याचे पाहायला मिळाले.

या निवेदनामध्ये गोवंशाच्या संरक्षणासाठी कडक कायद्यांची अंमलबजावणी, भटक्या जनावरांच्या समस्येवर ठोस उपाययोजना, गोशाळांना आवश्यक सुविधा व आर्थिक मदत, तसेच जनजागृती मोहिमा राबविण्याच्या मागण्या करण्यात आल्या. ग्रामीण भागात वाढणाऱ्या समस्यांमुळे शेतकरी व नागरिक त्रस्त असल्याचेही यावेळी निदर्शनास आणून देण्यात आले.

यावेळी उपस्थित कार्यकर्त्यांनी सांगितले की, गोवंश हा भारतीय संस्कृतीचा महत्त्वाचा घटक असून त्याचे संवर्धन ही काळाची गरज आहे. प्रशासनाने या विषयाकडे गांभीर्याने लक्ष देऊन तातडीने ठोस पावले उचलावीत, अशी अपेक्षा व्यक्त करण्यात आली.

निवेदन सादर करताना मिलिंदजी शेठ, सचिनजी गायकवाड, प्रमोदजी पांगारकर, राकेशजी भांबीड, सुनंदनजी भावे, रोहनजी केळसकर, प्रदिपजी शेठ, वामनजी आपटे, सुरेजी रेवाळे, योगेशजी पटेल, संतोषजी गवळी, ओमकार वेल्हाळ, सुजल जैसवाल यांच्यासह अनेक गो रक्षक व नागरिक मोठ्या संख्येने उपस्थित होते. त्यांच्या सहभागामुळे अभियानाला अधिक बळ मिळाल्याचे दिसून आले.

अभियानाच्या वतीने भविष्यातही विविध स्तरांवर जनजागृती उपक्रम राबविण्यात येणार असल्याचे सांगण्यात आले. तसेच शासन व प्रशासनाने योग्य ती दखल घेऊन लवकरात लवकर सकारात्मक निर्णय घ्यावा, अशी अपेक्षा व्यक्त करण्यात आली.