दापोली (प्रतिनिधी) – “प्लास्टिक मुक्त दापोली” या संकल्पनेला प्रत्यक्षात उतरवत जेसीआय दापोली आयोजित ‘जेसीआय चषक 2026’ ही भव्य क्रिकेट स्पर्धा उत्साह, एकजूट आणि सामाजिक बांधिलकीचा प्रेरणादायी संगम ठरली. तीन दिवस चाललेल्या या स्पर्धेला दापोलीकरांचा उत्स्फूर्त प्रतिसाद लाभला.

स्पर्धेचे उद्घाटन दापोलीच्या नगराध्यक्षा कृपाताई घाग, राष्ट्रवादी महिला काँग्रेसच्या जिल्हाध्यक्षा साधनाताई बोत्रे, पंचायत समिती सदस्य श्रीराम इदाते तसेच जेसीआय दापोलीचे अध्यक्ष डॉ. कुणाल मेहता यांच्या हस्ते पार पडले. यावेळी सामाजिक बांधिलकी जपत बहुजन हिताय विद्यामंदिर (आगरवायंगणी) आणि रामराजे स्कूल अँड कॉलेज (दापोली) यांना सॅनिटरी डिस्पोजेबल मशीन प्रदान करण्यात आले.

या स्पर्धेत तब्बल 19 संघांनी सहभाग नोंदवत सामने रंगतदार झाले. अंतिम सामन्यात इमाद पॅकर्स संघाने उत्कृष्ट खेळ करत विजेतेपद पटकावले, तर सनी कोंड, दापोली संघ उपविजेता ठरला.

🏆 विशेष पुरस्कार विजेते

मालिकावीर: ओसामा (इमाद पॅकर्स)

सर्वोत्तम फलंदाज: ओसामा (इमाद पॅकर्स)

सर्वोत्तम गोलंदाज: अमित (सनी कोंड)

सर्वोत्तम क्षेत्ररक्षक: जतिन साळगावकर (दापोली 11)

बक्षीस वितरण सोहळ्यास नगराध्यक्षा कृपाताई घाग, साधनाताई बोत्रे, डॉ. जयवंत जालगांवकर, राजू घोसाळकर, राहुलशेठ राठोड, मिलिंद शेठ यांच्यासह अनेक मान्यवर उपस्थित होते.

या स्पर्धेच्या माध्यमातून “प्लास्टिक मुक्त दापोली”, पर्यावरण संवर्धन आणि स्वच्छतेचा संदेश देण्यासाठी विविध उपक्रम राबविण्यात आले. यामध्ये कागदी व कापडी पिशव्यांचे वितरण, एसटी चालक-वाहक व रिक्षाचालकांना स्टील बाटल्यांचे वाटप, बीच स्वच्छता मोहीम आणि जनजागृती अभियानाचा समावेश होता.

या उपक्रमाच्या यशस्वितेसाठी जेसीआय दापोलीचे अध्यक्ष डॉ. कुणाल मेहता, बासीत देशमुख, तेजस मेहता, रोशन वेदक, सीए रुषी शेठ, अद्नान मुकादम, रुषी तलाठी, भूषण इसवलकर, कुणाल मंडलिक, स्वप्नील मेहता, अनिकेत खानविलकर, फराझ रखांगे तसेच सर्व सदस्यांनी मोलाचे योगदान दिले.

“खेळ, समाज आणि पर्यावरण” यांचा संगम घडवणारा हा उपक्रम दापोलीकरांसाठी प्रेरणादायी ठरला असून अशा उपक्रमांमुळे समाजात सकारात्मक बदल घडत असल्याची भावना व्यक्त होत आहे.

✍️ संपादक – सुदेश सुरेश तांबे

📰 विद्या वंदा न्यूज

“तुमची बातमी, तुमचा हक्क!”