दापोली (प्रतिनिधी):

दापोली शहरातील फॅमिली मॉल परिसर व फडके दवाखाना गल्ली येथे गेल्या चार दिवसांपासून पाणीपुरवठा पूर्णपणे खंडित झाल्याने नागरिकांमध्ये तीव्र संताप व्यक्त होत आहे. घराघरात पाण्याचा एक थेंबही शिल्लक नसल्याने दैनंदिन जीवन पूर्णपणे विस्कळीत झाले आहे.

स्थानिक नागरिकांच्या म्हणण्यानुसार, पाणीपुरवठा विभागाशी वारंवार संपर्क साधूनही “आज सोडतो, उद्या सोडतो” अशी केवळ उडवाउडवीची उत्तरे दिली जात आहेत. मात्र प्रत्यक्षात पाणीपुरवठा सुरू झालेला नाही.

सध्या परिस्थिती इतकी गंभीर झाली आहे की घरातील अंघोळ, कपडे धुणे, स्वयंपाक आणि पिण्याच्या पाण्याच्या मूलभूत गरजा पूर्ण करणेही अशक्य झाले आहे. अनेक घरांमध्ये सर्व भांडी रिकामी पडली असून नागरिकांना बाहेरून पाणी आणण्याची वेळ आली आहे.

नागरिकांनी संतप्त प्रतिक्रिया देत तातडीने पाणीपुरवठा सुरू करण्याची मागणी केली आहे. “आता तात्काळ पाणी सोडले नाही तर मोठ्या प्रमाणात आंदोलन छेडले जाईल,” असा इशाराही स्थानिकांनी दिला आहे.

दरम्यान, संबंधित विभागाने याकडे गांभीर्याने लक्ष देऊन तातडीने उपाययोजना करावी, अशी मागणी परिसरातील रहिवाशांकडून होत आहे.